HOPE-Sint Nyi (စိတ်ခွန်အားဖြည့်စာစုများ)

HOPE ဆိုတဲ့ စာအုပ်ထဲမှာ ဘာတွေလုပ်ရင် အောင်မြင်မယ်၊ ကြီးပွား မယ်ဆိုတာ မပါပါဘူး။ ဒါပေမယ့် ဘာလုပ်ရင် မွဲတတ်တယ် ဆိုတာရယ်၊ အဖက်ဖက်က နိမ့်ကျနေလို့ သတ်သေချင်စိတ် ပေါက်နေတဲ့ အချိန်မျိုးတွေမှာ ဘယ်လို ဖြတ် ကျော်ခဲ့လဲ၊ ဘယ်လို ဖြတ်ကျော်သင့်လဲဆိုတဲ့ အရာတွေကို ရေးပေးထားပါတယ်။ ကျွန်တော်က စာရေးဆရာတစ်ယောက် မဟုတ်ပါဘူး။ ဘဝအကြောင်း ရေးတဲ့ သူလိုကိုယ်လို သာမန်လူတစ်ယောက်ပါ။ ရေးတတ်သလို ရေးထားတာ ဖြစ်လို့ စာကို စာလိုရေးတာထက် အစ်ကိုကြီးတစ်ယောက်က သူ့ရဲ့ညီလေး၊ ညီမလေးတွေကို သူမှားခဲ့တဲ့ အမှားတွေအကြောင်းကို ထိုင်ပြောပြနေတဲ့ပုံစံမျိုး ဖြစ်နေတာကိုတော့ နားလည်ပေးစေချင်ပါတယ်။ ကျွန်တော့်ရဲ့ ၃၅ နှစ်တာ ဖြတ်သန်းလာခဲ့ရတဲ့ အနိမ့်အမြင့် အတက်အကျ တွေထဲက ရှုံးနိမ့်မှုများစွာကို စုစည်းပြီးတော့ အများအတုယူဖို့ ရေးတတ်သလို ချရေးလိုက်တာပါ။ ကျွန်တော်ကိုယ်တိုင် တစ်နှစ်နေလို့ စာအုပ်တစ်အုပ်မဖတ် ဖြစ်ပါဘူး။ စာဖတ်ရတာ အင်မတန် ပျင်းပါတယ်။ စာဖတ်ရမှာ ပျင်းတော့ ဗဟုသုတ မရှိ၊ အမြင်မရှိလို့ ဘဝအတွေ့အကြုံ တွေကို ငွေနဲ့ ပေးဝယ်ခဲ့ရပါတယ်။ တချို့ အတွေ့အကြုံတွေက သိန်းရာနဲ့ချီ တန်ပါတယ်။ ဒီစာအုပ်က အရမ်းဆင်းရဲ ခက်ခဲလို့ ဘဝကို သတ်သေဖို့အထိ အရှုံးပေးမယ် စဉ်းစားနေတဲ့သူတွေ ဖတ်ဖို့ ရည်ရွယ်ပြီး ထုတ်ထားတာပါ။ သင့်ပတ်ဝန်းကျင်မှာ အရမ်း စိတ်ဓာတ်ကျ၊ စိတ်ပျက်နေတဲ့သူရှိရင် ဒီစာအုပ်လေးကို ဖတ်ခိုင်းပေးပါ။ ကိုယ်တွေ့ အတွေ့အကြုံစစ်စစ်တွေဖြစ်လို့ အကျိုးမရှိရင်တောင် အကျိုးမမဲ့စေရဘူးလို့ အာမခံပါတယ်။ ဒီစာအုပ် ရောင်းချ ရတဲ့ငွေ အကုန်လုံး “နိုင်သလောက်” ပရဟိတမှာ ကိုယ်ဝန်ဆောင်မိခင်တွေ ကလေးမွေးဖွားဖို့အတွက် လှူဒါန်းသွားမှာပါ။