ပြောတတ် ဆိုတတ် ပေါင်းသင်းတတ်တဲ့သူ- ဖေမြင့် လူမှုဆက်ဆံရေးကောင်းလိုသူများအတွက်

လူမှန်သမျှ အသက်မွေးဝမ်းကျောင်း အတတ်ပညာ တစ်ခုစီ တတ်ဖို့ လိုအပ်မြဲ ဖြစ်သည်။

အတတ်ပညာ တစ်ခုရှိမှ လောကအလယ် တင့်တောင့် တင့်တယ် ရပ်တည်နိုင်သည်။ သက်ဆိုင်ရာ အတတ်ပညာ၌ ကျွမ်းကျင်လေ ပို၍ တင့်တယ်အောင်မြင်လေ။

သို့သော် ကမ္ဘာမှာ၊ မြို့ပြ ပြည်ရွာတွေမှာ တစ်နေ့တခြား လူဦးရေ တိုးပွားကာ လူနေထူထပ် ကျပ်သိပ်လာသည်နှင့်အမျှ လူနှင့်လူချင်း ဆက်ဆံပေါင်းသင်းရေးကိစ္စ ဆိုသည်က အရေးပါ လာသည်။ ပညာတစ်ရပ် တတ်ထားရုံနှင့် မပြီး၊ ကိုယ့်ပညာ၏ စွမ်းအားကို လူအများကြား အထိရောက်ဆုံး ပုံစံဖြင့် ဖြန့်ချိပြသ နိုင်မှသာ သည်ပညာမှ အကျိုးကျေးဇူးအပြည့်အဝ ခံစားရနိုင်မည့် သဘော ရှိလာသည်။စက်မှုသိပ္ပံနယ်မှာ ပါရမီရှင် အခေါ်ခံရလောက်အောင် ထူးချွန်သူချင်း အတူတူ တစ်ဦးက ဓာတ်ခွဲခန်းထဲ အလုပ်ရုံထဲမှာ ဘဝကို နှစ်မြှုပ်ကာ မပြည့်မစုံ မထင်မရှား အချိန်ကုန်သွားရပြီး အခြားတစ်ဦးကမူ နာမည်ကျော် စက်မှုလုပ်ငန်းရှင်ကြီး သူကြွယ် ကြီး ဖြစ်လာသည်။

ပန်းချီပန်းပု အနုပညာနယ်မှာ ပါရမီရှိသူချင်း အတူတူ ကုပ်ဖန်တီးသည့် တစ်ဦးက နေအိမ် အလုပ်ခန်းလေးထဲမှာ တကုပ်ကုပ်ဖန် ထိပ်တန်းအနုပညာလက်ရာ များစွာမှ ထိုက်ထိုက်တန်တန် အကျိုးမခံစားရဘဲ ဆင်းရဲမွဲတေစွာ ကွယ်လွန်ခဲ့ရပြီး အခြား တစ်ဦးကမူ မိမိလက်ရာကို အများပြည်သူတို့ အမြင့်မားဆုံး တန်ဖိုးထားကြအောင် ဖြန့်ချိတင်ဆက်နိုင်ခဲ့သဖြင့် အနုပညာ အရရော ငွေကြေးအရပါ ကျော်ကြားအောင်မြင်ခဲ့သည်။

ပညာအခြေခံချင်း တူပါလျက် ဘာကြောင့် ဘဝအခြေ အနေတွေ အဲသလို ကွာခြားသွားကြရသနည်း။

အဓိကအချက်က လူအများနှင့် ဆက်ဆံရေးကိစ္စဖြစ်သည်။ တချို့က အတတ်ပညာ ရှိသော်လည်း လူမှုဆက်ဆံရေး ကျတော့ အလွန် ညံ့ဖျင်းကြသည်။ တချို့က ပညာလည်း ရှိသည်၊ လူမှုဆက်ဆံရေးလည်း ကျွမ်းကျင်သည်။ ပြောတတ်ဆိုတတ် ပေါင်းသင်းတတ်သည်။

သည်အခါ မိမိကို သူတစ်ပါး အထင်အမြင်ကောင်းအောင် ဖန်တီးနိုင်သည်။ တစ်ဖက်သားတို့ မိမိဘက်ပါအောင် စည်းရုံး နိုင်သည်။ သည်အခါ မိမိက အများသူငါထက် ပို၍ ထူးခြား အောင်မြင်သည်။

စင်စစ် ယနေ့ခေတ်၌ လူမှုဆက်ဆံရေးသည်ပင် သီးခြား အတတ်ပညာတစ်ရပ် ဖြစ်လျက်ရှိသည်။

ကုမ္ပဏီကြီးများ စက်ရုံ အလုပ်ရုံကြီးများ ရုံးဌာနကြီးများ အဖွဲ့အစည်းကြီးများသာမက သမ္မတ၊ ဝန်ကြီးချုပ် စသည့် နိုင်ငံ အကြီးအကဲများ၊ ရုပ်ရှင် ဂီတ စသည်တို့မှ အနုပညာထိပ်သီးများ အပါအဝင် အရေးကြီးပုဂ္ဂိုလ် အများအပြားပင် မိမိတို့အတွက် အများပြည်သူဆက်ဆံရေးကိစ္စများကိုတာဝန်ယူဆောင်ရွက်ပေး မည့် ကျွမ်းကျင်သူများအား တန်ဖိုးကြီးပေးကာ ငှားရမ်းသုံးစွဲနေရ သည်။ သူတို့ အကြံပေးလမ်းညွှန်သည့်အတိုင်း လိုက်နာ ဆောင် ရွက်နေရသည်။ အကြောင်းက အများပြည်သူဆက်ဆံရေး ကိစ္စ များသည် မိမိတို့၏လုပ်ငန်း-ဘဝ အတက်အကျကို များစွာအဆုံး အဖြတ် ပေးနိုင်ကြောင်း နားလည်ယုံကြည်ထားကြသောကြောင့် ဖြစ်သည်။

ယင်းသို့ အဖွဲ့အစည်းများ ပုဂ္ဂိုလ်များအတွက် ဆက်ဆံရေး အတိုင်ပင်ခံများအဖြစ် ဆောင်ရွက်ရန် မကြံရွယ်သည့်တိုင် လူ တိုင်းပင် မိမိရောက်ရှိသည့် အဆင့်၊ မိမိကျင်လည်ရသည့်နေရာ တို့၌ အဆင်ပြေ ချောမွေ့အောင်နှင့် ယခုထက် ပိုမိုမြင့်မားသော အနေအထားများသို့ ရောက်ရှိအောင် မိမိကိုယ်ကို မြှင့်တင်နိုင်ရန် ကား ဆက်ဆံရေးနည်းနာများ တတ်ကျွမ်းနေဖို့ လိုပေသည်။ * *

ပြောတတ်ဆိုတတ် ပေါင်းသင်းတတ်တဲ့သူ ဟူ၍ အမည် ပေးထားသည့် ဤစာအုပ်ထဲတွင် စာဖတ်သူတို့ အတုယူ နည်းမှီး လောက်သည့် အပြောအဆို လိမ္မာသူ၊ လူမှုဆက်ဆံရေး ကျွမ်းကျင်သူ ပါရဂူတို့၏ လမ်းညွန်ချက်များ၊ လက်တွေ့နည်းနာများကို ရှာဖွေစုစည်းကာ မြန်မာဘာသာဖြင့် ဆီလျော်အောင် ပြန်ဆို တင်ပြထားပါသည်။

လူမှုဆက်ဆံရေးနှင့် စပ်လျဉ်း၍ ကျယ်ဝန်းပြည့်စုံသော ကျမ်းကြီးတစ်စောင်သဖွယ် မဖြစ်သော်လည်း မိမိဘဝ တိုးတက် ကောင်းမွန်အောင် ပြုပြင်ရန် အစဉ်စိတ်ထက်သန်ကြသူတို့ အတွက်ကား လက်တွေ့အကျိုးပြုမည့် အချက်အလက်များစွာ ပါဝင်ကြောင်း မာတိကာကို ဖတ်ရှုရုံဖြင့်ပင် သိမြင်နိုင်လိမ့်မည် ဟု ယုံကြည်မိပါသည်။

စာဖတ်သူအား ထာဝစဉ်လေးစားလျက်...

ဖေမြင့်